Ana zargin ‘yan bindiga, da ake tsammanin yaran fitaccen jagoran ‘yan ta’addan nan ne Bello Turji, sun yi garkuwa da fasinjoji 10 kuma sun ƙone motarsu a kan hanyar Kaura-Namoda zuwa Shinkafi a Jihar Zamfara.

Lamarin ya faru kwana guda bayan da Hedikwatar Tsaro ta ayyana Turji a matsayin “mutumin da ba zai wuce shekara ta 2025 ba,” tana mai cewa shi da sauran shugabannin ta’addanci ba za su tsira ba.

Turji ya yi barazanar cewa zai ci gaba da yin garkuwa da kisan mutane a Jihar Zamfara da Sokoto idan ba a saki ɗan’uwansa, Baka Wurgi, wanda ke hannun sojoji ba, kafin ƙarshen Disamba 2024.

An kai Wurgi babban Asibitin Shinkafi, inda sojoji suka dauke shi daga gadon asibiti.

Turji ya yi barazanar kaddamar da hare-hare kan mutanen yankin idan sojoji suka cigaba gaba da tsare Wurgi .

An gano cewa ‘yan bindigar sun tare motar fasinja da misalin ƙarfe 8 na safe yayin da take dauke da fasinjoji 10 zuwa garin Shinkafi daga Gusau, babban birnin Jihar Zamfara.

Lamarin ya faru ne a ƙauyen Kwanar Jalab, gundumar Zungeru, LGA ta Shinkafi.

Wani ɗan asalin yankin, Garba Sani, ya ce ‘yan bindigar sun yi garkuwa da dukkan fasinjojin da ke cikin motar sannan suka ƙona motar.

Sani ya bayyana cewa wannan shi ne karo na farko da ‘yan bindiga suka ƙone mota bayan yin garkuwa da fasinjoji.

“Wannan shi ne karo na farko da muke fuskantar irin wannan mummunan al’amari da ‘yan bindiga za su ƙone mota bayan sun yi garkuwa da fasinjoji.

“Sun saba yin garkuwa da mutane a kan hanya, amma ba su taɓa ƙona mota ba bayan aikin ba,” in ji Sani.

Ya ce lamarin yana da alaƙa da barazanar Turji kan tsare ɗan uwansa.

Turji yayi garkuwa da mutum 10 a Zamfara