Kamfanin Starlink, da ke ba da sabis na intanet ta hanyar tauraron dan adam, ya sanar da karin farashin biyan kuɗin wata-wata a Najeriya.

Sabon farashin zai fara aiki nan take ga sabbin abokan ciniki, yayin da za su fara shafar masu amfani da suka riga suka yi rajista daga ranar 27 ga Janairu, 2025.

A wata wasika da kamfanin ya aike wa abokan hulɗarsa, Starlink ya bayyana cewa karin farashin ya zama wajibi don kyautata hanyar sadarwa da kuma tabbatar da ci gaba da ba da sabis mai nagarta a duk faɗin ƙasar.

Sabon tsarin farashi ya kasance kamar haka:

– Masu amfani da shi a gidaje za su dinga bitan N75,000

– Masu amfani da shi a tsarin tafi da gidanka a shiyya za su dinga biyan N167,000

– Masu amfani da intanet tsarin tafi da gidanka zuwa duka sassan duniya za su biya N717,000

Kamfanin ya kuma bayyana cewa masu amfani waɗanda ba sa son ci gaba da amfani da sabis ɗin na da damar soke rajistar su a kowane lokaci.

Starlink ya kara farashin intanet a Najeriya