Rahotanni na nuna cewa ‘yan kungiyar kwadago sun fara neman karin albashi fiye da Naira dubu saba’in a wannan sabuwar shekara ta 2025.

Shugaban ƙungiyar ƙwadago ta TUC, Festus Osifo, ya ce sun fara fafutukar dawo da ƙarin albashi duk shekara, maimakon yinsa bayan shekara biyar, inda ya ce ya kamata gwamnati ta riƙa zama tana ƙimanta mafi ƙarancin albashin ma’aikata bisa la’akari da farashin kaya a kowacce shekara.

Ya ce tuni suka fara wannan tattaunawa, kuma tana ɗaya daga cikin batutuwan da za su tasa gaba a wannan shekara domin tabbatar da ganin ana ƙara mafi karancin albashin da ake biyan ma’aikata duk shekara a kasar nan.

Shugaban kungiyar kwadago reshan Kano kwamared Kabir Inuwa inda yace abu ne mai wahala a iya samun hakan duba da yadda tattalin arziki yake a halin yanzu
A watan Yulin 2024 ne dai Shugaban kasa Bola Tinubu ya amince da ƙara mafi karancin albashi ga ma’aikatan daga naira 30,000 zuwa 70,000.

Sai dai kuma aiwatar da shi ya zama jidali a faɗin jihohin ƙasar, inda har yanzu wasu ba su kama hanyar biya ba.

Kungiyar kwadago na neman karin albashi a 2025