Gwamnatin Tarayyar Najeriya ta hannun Hukumar Kula da Harkokin Jiragen Sama, NCAA ta bayyana aniyarta na daukar matakin ladabtarwa kan kamfanonin jiragen sama da ke jinkirin tashi ba tare da gamsassun dalilai ba.

Haka kuma, ta yi kira ga Fasinjoji su kara samun fahimtar kalubalen da za su iya fuskanta yayin tafiye-tafiye ta filayen jiragen sama.

Shugaban Sashen Kare Hakkin Fasinjoji na Hukumar NCAA, Michael Achimugu, ya bayyana hakan a ranar Asabar yayin wani tattaki da aka gudanar a birnin Fatakwal, babban birnin Jihar Ribas.

Ya ce wannan lokaci ne na yawan tafiye-tafiye, don haka akwai bukatar wayar da kan matafiya yadda ya kamata kan dalilan jinkiri da hanyoyin magance matsalolin.

Achimugu ya bayyana cewa yanzu ne lokacin da ake yawan tafiye-tafiye ta jiragen sama, kuma ana fuskantar matsaloli da dama kamar jinkiri da rushewar jadawalin jirage, wanda ya haifar da korafe-korafe daga fasinjoji.

Ya ce aikin NCAA shi ne wayar da kan fasinjoji, domin sau da yawa matsalolin da ake samu na biyo baya ne daga rashin sanin hakkoki da nauyin da ke kansu a matsayin matafiya ta jiragen sama.

“Dole ne mu kare hakkin fasinja da kuma martabar kamfanonin jiragen sama,” in ji Achimugu.

Daily Post Hausa ta rawaito cewa wannan mataki na zuwa ne domin kare hakkin fasinjoji da kuma tabbatar da ingantacciyar hidimar sufuri a kasar.

Jinkirin Jirage: Najeriya za ta hukunta kamfanonin jiragen sama masu laifi