Jami’an ‘yan sanda 140 daga rundunar ‘yan sanda ta birnin tarayya Abuja sun rasa rayukansu yayin gudanar da aikinsu, yayin da aka kwato Naira miliyan 409,992,000 daga hannun masu laifi a lokacin wasu ayyukan tsaro daban-daban a shekarar 2024.

A cewar bayanin da kakakin rundunar, Josephine Adeh, ta fitar a ranar Laraba, ta bayyana yadda aka kwato Naira miliyan 36.85 daga hannun masu garkuwa da mutane da Naira miliyan 68.552 daga ‘yan fashi da makami da Naira miliyan 19.59 daga brayi sai Naira miliyan 285 daga’ yan damfara.

A cikin shekarar 2024, Adeh ta bayyana cewa an samu rahoton laifuka 1,426, wanda ya haifar da kama mutane 1,077 da ake zargi.

A 2024, laifukan damfara ne suka fi yawa, inda aka samu rahotanni 385 da kama mutane 422. Masu fashi da makami sun zo na biyu da rahotanni 268 da kama mutane 132.

A bangaren fashi irin na “one-chance,” an samu rahotanni 263 da kama mutane 71. Satar mota ta zo na hudu da rahotanni 127 da kama mutane 64, yayin da aka samu raboton garkuwa da mutane 104 da kama mutane 216.

“Game da laifukan intanet (cybercrime), an samu rahotanni 32 tare da kama mutane 15. Kisan kai kuwa ya yi rahotanni 68 tare da kama mutane 78. Sata ta yi rahotanni 73 tare da kama mutane 20, yayin da kungiyar asiri suka yi rahotanni 38 tare da kama mutane 59,” kamar yadda rahoton ya bayyana.

Rahoton ya kuma bayyana cewa an kwato bindigogi 376, ciki har da mujallar AK-47 guda 13 da harsashi masu rai guda 187.

“An kwato motoci 73 daga masu satar mota, 24 daga fashi irin na ‘one-chance,’ da biyu daga kungiyar asiri. A cewar kididdigar, an samu raguwar laifuka da kaso 15.1% tsakanin shekarar 2023 zuwa 2024. Bugu da kari, an ceto mutane 68 daga hannun masu garkuwa da mutane da kuma mutane 19 daga hannun masu fashi irin na ‘one-chance,’” rahoton ya kara da bayyana.

Haka kuma, rahoton ya bayyana cewa jami’an ‘yan sanda 140 sun rasa rayukansu a bakin aiki, yayin da aka samu korafe-korafe 68 kan jami’an rundunar.

A bangaren shari’a, rundunar ta ce an gurfanar da masu garkuwa da mutan 38, inda aka yanke wa 21 hukunci.

“A bangaren fashi irin na ‘one-chance,’ an gurfanar da 16, inda aka yanke wa 11 hukunci. Kisan kai: an gurfanar da 32, aka yanke wa 8 hukunci; damfara: an gurfanar da 178, aka yanke wa 58 hukunci; kungiyar asiri: an gurfanar da 19, aka yanke wa 11 hukunci; sata: an gurfanar da 26, aka yanke wa 8 hukunci; da satar mota: an gurfanar da 21, aka yanke wa 11 hukunci,” kamar yadda rahoton ya bayyana.

A cikin tsare-tsaren shekarar 2025, Adeh ta ce za a mai da hankali kan karfafa alaka da al’umma da kuma aiwatar da dabarun tsaro.

An kashe yan sanda 140 a Abuja cikin 2024