Mai ba shugaban kasa shawara kan tsaron Kasa, Malam Nuhu Ribadu, ya bayyana cewa ba za a iya samun nasarar yakar ta’addanci da aikata miyagun laifuka ba tare da hadin kai da goyon bayan ‘yan kasa ba.

Ribadu ya kuma yi kira ga ‘yan kasa da su gaggauta ba da rahoto ga hukumomin tsaro kan duk wani abu da ba su gamsu da shi ba.

Wannan na kunshe a cikin sakonsa na sabuwar shekara da Babban kwamanda na cibiyar kasa ta yaki da ta’addanci, Ofishin NSA, Manjo Janar Adamu Laka, ya sa wa hannu.

Ribadu ya tabbatar da cewa tare da hadin gwiwa, za a magance ta’addanci, tsattsauran ra’ayi da sauran manyan laifuka a shekara ta 2025.

Ya jaddada cewa hukumomin tsaro za su ci gaba da jajircewa wajen kare kasar.

“Tsaro hakkin kowa ne. Ba za a iya samun nasarar yakar ta’addanci da miyagun laifuka ba tare da hadin kai da goyon bayan ‘yan kasa ba. Saboda haka, ina rokon ku da ku gaggauta bayar da rahoto kan duk wani abu da ba ku amince da shi ba ko wani motsi da ba ku gamsu da shi ga hukumomin da suka dace. Idan kun ga wani abu, ku sanar,” in ji Ribadu.

Ya kuma tabbatar wa ‘yan Najeriya da cewa hukumomin tsaro za su ci gaba da jajircewa wajen tabbatar da tsaro da kariyarsu.

Sai jama’a sun taimaka mana – Ribadu kan magance rashin tsaro