Rundunar yansandan jihar Kano ta kama wasu gungun masu laifi da ake zargi da satar wayoyin jama’a a unguwa 3.

Wadda ake zargi da jagorantar kungiyar, mai suna Shamsiyya Adamu, mai shekaru 19 dake Unguwar Brigade, an kama ta a ranar 21 ga Disamba, 2024, bayan karuwar korafe-korafe game da satar wayoyin salula a Unguwar

Kakakin rundunar SP Abdullahi Haruna Kiyawa a yayin holin masu laifin Ranar Alhamis a shalkwatar rundunar dake Bompai, yace al’umma ne ke bayyana damuwarsu game da matashiya da ke satar wa mutane wayoyin salula har cikin gidajensu.

Rahotanni sun nuna cewa, Shamsiyya tana aiki tare da wani direban adaidaita sahu da kuma wani mai aikata laifukan intanet (cybe criminal) wanda ke taimaka mata wajen satar kudi daga asusun bankunan wadanda abin ya shafa..

Kwamishinan ‘Yan Sandan Jihar Kano, CP Salman Dogo Garba, ya kafa wata tawaga ta musamman domin bincike, wanda hakan ya kai ga kama Shamsiyya.

Baya ga Shamasiyya, sauran wadanda aka akam sun hada da

• Idris Yusuf (23) – Direban adaidata sahu da ya taimaka wajen daukar Shamsiyya zuwa wajen aikata laifuka.

• Al’asan Dahiru (24) – Ya kware wajen sayar da kayayyakin da aka sace.

• Abdulmajid Haruna (27) – Ya kware wajen sayen kayayyakin da aka sace; an kwato wayoyi guda shida daga gare shi.

• Salim Auwalu (21) – Ya kware wajen satar kudi daga asusun bankunan wadanda abin ya shafa.

An kwato wayoyi guda shida da aka sace har zuwa yanzu, kuma ana ci gaba da bincike domin gano karin wayoyi da aka sace. Mutane talatin (30) ne suka shigar da kara, ciki har da mata 29 da namiji 1, wanda Shamsiyya ta amince da satar wayoyinsu a cikin shekarar 2024.

Rundunar yan sandan Kano ta damke gungun barayin waya