Dan takarar gwamnan Jihar Legas daga jam’iyyar Labour Party (LP) a zaben 2023, Gbadebo Rhodes-Vivour, ya caccaki gwamnatim Bola Tinubu kan sauye-sauyen tattalin arziki da aka yi tun hawansa a matsayin shugaban kasa.

A cewar Rhodes-Vivour, sauye-sauyen na taimakawa ne kawai ga wasu ‘yan kasa na musamman, yayin da yawancin al’umma ke ci gaba da jin mummunan tasirin hakan.

Rhodes-Vivour ya bayyana hakan ne a cikin wata hira da ya yi da Channels Television a ranar Alhamis.

Ya ce, “Mutanen suna fuskantar talauci mai yawa. A yau, fiye da kashi 70 cikin 100 na kudin mutane na tafiya ne akan abinci da kudin mota”

Yana mai cewa ba a dauki matakan da za su taimaka wajen saukaka rayuwar al’umma ba, musamman wajen samun masauki.

Ya ci gaba da cewa, “Akwai al’adar wauta da kudi wanda bai dace da irin halin da tattalin arzikin kasar ke ciki. Abin da ke faruwa na nuna cewa masu amfani da wannan sauye-sauyen tattalin arziki sune kawai ‘yan banki, masu gwamnati, da abokanan shugaban kasa.

“Nawa ne daga cikin ‘yan Najeriya za su iya cewa suna cin gajiyar wadannan sauye-sauyen?” Rhodes-Vivour ya tambaya.

Dan takarar ya yi Allah wadai da yadda sauye-sauyen tattalin arzikin suka mayar da talakawa cikin mawuyacin hali, yana mai cewa ba a shirya yadda za a warware matsalolin tattalin arziki da mutane ke fuskanta ba.

Rhodes-Vivour ya caccaki gwamnatin Tinubu kan sauye-sauyen tattalin arziki