Hukumar Kididdigar Jama’a ta Kasa (NPC) ta bayyana cewa ta samu nasarar yin rijistar sama da yara miliyan 10 masu shekaru daga sifili zuwa biyar a cikin watanni uku da suka gabata.

Shugaban hukumar, Alhaji Nasir Kwarra, ya bayyana hakan yayin da yake zantawa da manema labarai bayan uwargidan shugaban kasa, Sanata Oluremi Tinubu, ta mika takardar haihuwa ga jaririn farko na shekarar a Asibitin Asokoro, Abuja, a ranar Laraba.

Kwarra, wanda ya samu wakilcin kwamishinan tarayya daga Jihar Katsina, Bala Banya, ya bayyana wannan nasara a matsayin wani babban ci gaba wajen kafa tsarin kula da shaidar zama dan kasa mai inganci.

Ya jaddada muhimmancin yin rijistar haihuwa, yana mai cewa hakan yana ba da shaidar zama dan kasa tare da tabbatar da matsayin yaro a matsayin dan Najeriya.

NPC ta hada tsarin bayar da takardun haihuwa ta yanar gizo da tsarin Lambar Shaida ta Kasa (NIN).

A cewarsa, “Yara da aka yi wa rijista yanzu ana basu NIN kai tsaye lokacin yin rijistar haihuwar su, wanda hakan yana tabbatar da shigar su cikin kundin bayanan kasa.”

Ya kara da cewa:
“A cikin watanni uku da suka gabata, mun yi wa yara sama da miliyan 10 masu shekaru daga sifili zuwa biyar rijista. Kuma wannan rijistar na gudana ba tare da katsewa ba.

“Yanzu za mu mai da hankali sosai kan yin rijistar yara da ba su kai shekara daya ba, kuma muna samun gagarumin ci gaba,” in ji shi.

NPC tayi rijistar sama da yara miliyan 10 a watanni uku