Mutane guda bakwai sun rasa rayukansu, yayin da 31 suka samu raunuka a wani hatsarin mota da ya faru a kan titin Kaltungo–Cham, a Jihar Gombe, ranar Alhamis.

Kakakin Hukumar Tsaro ta Tituna ta Kasa (FRSC) a Gombe, Mr. Samson Kaura, ne ya tabbatar da faruwar wannan mummunan hatsari wanda ya faru da misalin karfe 7:30 na safiya.

Kaura ya bayyana cewa, hatsarin ya faru ne sakamakon matsalar taya da birki na wata mota dake daukar kaya wadda ta tafi da fasinjoji 38, ciki har da maza 34, mata 2, da yara 2.

A cikin wadanda suka mutu, akwai maza guda biyar, mace daya da kuma yaro.

An tura gawarwakin zuwa asibitin Kaltungo domin gudanar da bincike, yayin da wadanda suka samu raunuka suna samun kulawar likitoci.

Kaura ya bayyana damuwarsa kan yadda wasu mutane ke shiga manyan motoci masu dauke da kaya domin rage kudin mota.

Kakakin ya kuma yi kira ga direbobi da su mai da hankali wajen duba lafiyar motocinsu domin gujewa faruwar irin wannan hatsari.

Ya kara da cewa, “Motocin daukar kaya ba su dace da daukar fasinjoji ba, kuma wannan hatsari yana nuna irin hatsarin da ke tattare da hakan.”

Mutane 7 sun rasa rayukansu a hatsarin mota a Gombe