Rahotanni da dumi dumi na cewa hambararren Shugaban Siriya, Bashar al-Assad, da iyalinsa sun isa Moscow, kamar yadda kafofin yada labarai na gwamnatin Rasha suka bayar da rahoto.

Wasu majiyoyi daga fadar Kremlin sun ce an ba Assad da iyalinsa mafaka a Rasha.

Sai dai babu tabbacin haka a hukumance.

Tun bayan faduwar gwamnatin Assad a ranar Lahadi, aka tabbatar da ya bar kasar, sai dai ba’a san inda ya dosa ba.

Shekaru hudu da suka gabata, alamu na nuna kamar yadda yakin basasar Siriya ya tsaya, inda gwamnatin Assad ta dawo da iko a mafi yawan biranen Siriya tare da taimakon Rasha, Iran, da kuma kungiyoyin mayaka masu goyon bayan Iran kamar Hezbollah.

Masana na cewa wannan ya faru ne saboda shekaru da yakin ya dauka, takunkumi, da cin hanci – yayin da abokan hulɗar kasar, Rasha da Iran, suka shagala da sauran rikice-rikice dake addabarsu.

Hamɓararren shugaban Syria, Assad ya sauka a Rasha