Gwamnan Jihar Kano, Alhaji Abba Kabir Yusuf, ya bayyana alhinin sa bisa rasuwar mahaifiyar Gwamnan Jihar Jigawa, Umar Namadi Danmodi, Hajiya Maryam Namadi Umar, wadda ta rasu a safiyar Laraba, 25 ga Disamba, 2024, bayan gajeriyar jinya.

A wata sanarwa da kakakin Gwamnan Kano, Sunusi Bature Dawakin Tofa, ya fitar, Gwamna Yusuf ya miƙa ta’aziyyarsa ga Gwamna Namadi, iyalansa, da al’ummar Jihar Jigawa.

Ya yi addu’ar Allah ya jikanta, ya gafarta mata kurakuranta, ya kuma bai wa iyalanta ƙarfin zuciya don jure wannan babban rashi.

Gwamna Yusuf ya bayyana Hajiya Maryam a matsayin mace mai kyawawan dabi’u da tsantsar addini, wadda gadon alherinta da gaskiyarta zai ci gaba da zama abin koyi ga waɗanda suka san ta.

Gwamnan Kano ya samu halartar sallar jana’izar Hajiya Maryam Namadi Umar.

Sallar jana’izar ta jawo manyan mutane, ‘yan uwa, da abokan arziki, lamarin da ya nuna irin girman girmamawar da Hajiya Maryam ta samu a rayuwarta.

Gwamna Yusuf yayi jimamin rasuwar mahaifiyar Namadi